حملت صديقتي إلي بملف يحتوي على طلبات مدرسة ابنتها مكتوبة باللغة الإنجليزية لأساعدها في فك شفرات الطلبات «العجيبة» المدونة. «أحلام قولي لي، إيش قصدهم بال«ليجال باد»الأصفر مقاس 8.5 x11.75 inches؟» «الليجال باد هذا الله يسلمك يعني هذا الاختراع اللي يشبه الدفتر بس بدون غلاف، فيه ورق مسطر وخلفه خلفية كرتون ويقطع من أعلى الصفحة لكتابة الملاحظات،إلخ» «آه! وهذا في إيش راح يحتاجوه، ولا بس زيادة وزن بالشنطة وتعذيب في البحث للأمهات، ما علينا، طيب، ايش هو «البول بوينت بين»؟ شكله شي مهم واختراع والله يستر ما يكون غالي لأنهم طالبين منه ألوان وأعداد، 4 من كل لون أحمر وأخضر وأزرق وأسود؟». «لا ياعزيزتي لا تتوتري، هذا قصدهم به القلم الجاف العادي» «هو القلم الجاف صار اسمه بول بوينت بين! يعني لازم الفزلكة والفلحنة مايقولوا قلم وخلاص»، «طيب وإيش هو التو رينج بايندر، والتو هول بنش؟». «هذا ياعزيزتي الملف اللي تضعي فيه الورق، وخرامة الورق بس طالبين النوع اللي بفتحتين والملف المناسب له». «طيب سؤال هو «السوكس» مو معناه شراب بالإنجليزي؟». «نعم صحيح».. «طيب والبوك أنا أعرف انه الكتاب صح؟» «نعم صحيح». «طيب وإيش البوك سوكس! هذا اللي في قائمة الطلبات، احترنا أنا وزوجي في أمره؟ كيف صارت؟» وهل تلبس الكتب جوارب؟ «ضحكنا سويا، وقلت «لا ياستي هذا يعني غطاء بلاستيك لحماية الكتاب». «يعني تجليد».«قلت: نعم ولكن يكون مقصوص وجاهز يدخل فيه الكتاب وهو مستورد عادة». «آه، يعني غالي، الله المستعان، وهذا من وين ننقب عليه مع البترول ولا المعادن؟ وليش ما ينفع الجلاد العادي اللي تربينا عليه، الله يرحم أيام كنا نلف الدفاتر بالورق البني، أمي مرة ما لقت تجليد، لفت الدفتر بكيس نايلون أبيض سميك ورتبته ودبسته وصار بمنتهى الجمال، وأهو تعلمنا وتخرجنا وتوظفنا وصرنا أوادم. ياللا، خلي الأولاد يتعلموا، وخلي المدارس الخاصة تنفعهم». «نورني بالله طيب، إيش معنى السبجيكت ديفايدرز» «هذا يا عزيزتي الورق أو البلاستيك الملون ذو الطرف الناتئ يوضع في الملفات لتفريق الورق حسب الموضوع». «أه أوكي طيب». طيب و«لاب كوت» هذا إيش؟ وإيش فايدته؟». «هذا الله يسلمك المعطف الأبيض للمعمل». «آه يعني ابني اللي في رابع ابتدائي راح يصير دكتور زي خاله، طيب الحمد لله» يعني هذا لازم له مشورا مخصوص بره المكتبة. طيب وايش معنى «كستم ميد انترناشونال داي كلوز». «هذا ياعزيزتي معناه لبس لليوم العالمي الذي سيحتفلون به يكون مصنوع خصيصاً للطفل بمقاسه» «هلا، هلا! يعني لازم نزلة لسوق القماش وزيارة للخياط، جوزي راح تجيله جلطة من المشاوير». «طيب وايش هو الجود كوالتي توث برش آند توث بيست». «هذا ياعزيزتي يعني نوع جيد من فراشي الأسنان والمعجون». «لا حول ولاقوة الا بالله! أنا راسلته المدرسة ولا دكتور الأسنان بس بدي أفهم؟ ياللا، ما علينا! نقول مدارس خاصة واهتمام بصحة الأطفال وأسنانهم. طيب، معناها زيارة للسوبرماركت كمان» «طيب إيش يعني ديس انفكتنج ويت وايبس». «هذه يا عزيزتي مناديل التعقيم». «الله، معناها زيارة للصيدلية كمان! جوزي راح يذبحني، والله شكلها أوبر أو كريم، يعني باختصار التكاسي راح يستفيدوا من موسم المدارس، والسوبرماركتتات تستفيد من موسم المدارس، والمكتبات بتستفيد من موسم المدارس، والصيدليات بتستفيد من موسم المدارس والخياطين بيستفيدوا من موسم المدارس والمدارس بتستفيد من موسم المدارس، والأهل لهم الله بيتنكبوا من موسم المدارس».
