أقول في نفسي . . وش زودي عن صاحبنا الكويتب اللي صدق عميره ونجح مسلسله إلا ومغطنا بجزء ثاني وثالث ورابع إلخ إلخ إلخ وتدوم وتدوم وتدوم على باله (ليالي الحلمية وإلا رأفت الهجان وإلا الشهد والدموع) سقى الله هذيك الأيام الحلوة . . ما علينا نرجع لمسلسلات رمضان هذه السنة ونكمل الحدوتة، (الزوجة الرابعة) مصطفى شعبان بأي طريقة يبي يكون ممثل ولو بس أدقق في طريقة تمثيله بلاقي إنه جامع نور الشريف ومحمود عبدالعزيز والراحل أحمد زكي في شخصيته وتقليده لهم بس بشكل مبالغ فيه، المسلسل جدا جدا سخيف لا فكرة ولا مضمون، تقليد لمسلسل الحاج متولي. ولو نتذكر المسلسل ما كان فيه الاستعراض الراقص وبالحلال يا كثر ما قالها لدرجة إنه ذكرني بمسرحية (باي باي عرب) لما قال الجرسون للفنان حسين عبدالرضا هذا اللحم مذبوح على الشريعة الإسلامية وسأله حسين وش اسمك قال طوني ضحك ورد عليه طوني: على الشريعة الإسلامية، وهذا هو حال مصطفى شعبان وكملت اللعبة معه (علا غانم) هذا عاد لحاله مشروع كباريه متنقل، العام الماضي زوجة أبوه في العار هالسنة زوجته (يا بلاش) وإلى الآن ما أعرف بالضبط هم وش يبون يقولوا من المسلسل، التعدد وإلا إيش يعني؟ مع (سبق الإصرار) غادة عبدالرزاق هالحرمة من يوم تزوجت في نفس يوم زواج بنتها وأنا أقول فيها شيء صاب مخها ؟ طبعا هي من قبل ضاربة فيوزها بس هالمرة هي وماجد المصري اللي خصصوا لهم حلقة كاملة في برنامج قبل رمضان يتكلمون فيها عن النيولوك اللي مدري وش الجديد فيه وأنا «غاسلة» يدي منهم وإلا روجينا هذه انهبلت على كبر عقب الثورة وين روجينا المزيونة العاقلة الزينة اللي ماتدري وين باب الفن من وين؟ استخفت وإلا إيش؟ هذا لو أطق لها تنكة طمرت ترقص مدري هم قالوا لها ما عاد ينفع معك الرزانة خليك خفيفة هم يقصدون خفيفة الحركة مو خفيفة عقل بس الظاهر أن «الصقة» جتها أقصد أن سمعها صار ثقيل وسمعت غلط. (الإخوة أعداء) المسلسل سياقه جميل وصلاح السعدني أبدع مثل كل مرة في دور رجل الأعمال (سيد الدقاق)، بس كأنه بدأت المكينة تخبط عنده لما صار يظهر بلقطات مع زوجته الثانية، ولاحظوا أن أغلبها في غرفة النوم ما أدري هالسنة كلهم عندهم هبة على غرفة النوم ممكن صار عندهم غرفة نوم خاصة لأول مرة . . الله أعلم؟ ولقاء الخميسي واللي أعتقد أن اسمها عاجبها تحاول بالغصب أنها تسوي إغراء، لا والمصيبة تقول في مشهد لصلاح السعدني (ما أعملش حاجة غلط واللي أعمله أسويه قدام الناس وزوجي واثق فيني) ونلاقيها في مشهد ثاني مع ولد (صلاح السعدني) واللي يقوم بدوره ياسر جلال تقول له (أنا أحبك وأدري إنك تحبني) وهو يقول (أنا ما أنكرش إني بأحبك) لاحظوا أنها متزوجة وهو يدري، أنا من شفت زوجها في المسلسل حجاج عبدالعظيم والباروكة اللي لابسها وسلاسل الذهب تقول كأنه من اليهود اللي نشوفهم في مسلسل رأفت الهجان وأنا قايلة البلا فيه هو «في المسلسل طبعا». (حكاية بنات) حاولت استوعب اسم المسلسل وفيه مسلسل سوري اسمه بنات العيلة ما قدرت، أدور على البنات ما لقيت، معليش كم أعمار الممثلات فيه حتى يختارونهم يقوموا بالدور (صبا مبارك وحورية فرغلي) بس ودي أعرف أعمارهم طول الوقت ضحك وتحاول كل واحدة تطلع مهاراتها بأنها تعرف لغات والوحيدة اللي فيهم غنية هي (حورية فرغلي) أو كوكي، أذكر أن كوكي يدلعون الأطفال الصغار وأحيانا واللي أمو .... ما علينا ما علينا على رأي (محمد صبحي)، المسلسل فيه فكرة بس مضمون سخيف، لا وبصراحة أنا أول مرة أسمع كلمة (إنتي سكرانة) في مسلسل عربي، لا وتقولها لصديقتها وهي تضحك والمشكلة أن الضحك أكثر من الكلام في المسلسل وليته على شيء يستاهل، (صبا مبارك) سقطت سقوطا ذريعا في هذا المسلسل و(حورية فرغلي) دورها في سيدنا السيد جيد بس في حكاية بنات مدري، الظاهر اللي كتب لها الدور كتب ضحك عشر صفحات وكلام صفحة لا وضحك تقول كأن فيها مس أول مرة أشوف ضحك متطور . (بنات العيلة) ينطبق عليهم نفس الشيء جميع الممثلات فيه تعدوا الثلاثين إذا هذولا بنات العيلة أجل غيرهم طفلات العيلة، بس أنا أستغرب من الفنانات السوريات في المسلسل، ما عمري شفتهم بهذه الجرأة والمبالغة في اللبس والضحك والقصص اللي صاير خشبة الحبس خمس خشبات، بس كأنهم نسوا أن بلدهم لحظة تصويرهم للمسلسل كانت ولا تزال تنحر شكلهم نسوا صح؟
