هادي رسالة جتني من مجموعة من طلاب وطالبات التقنية الحيوية والكيمياء الحيوية واللي بيشتكوا فيها من معاناتهم وهمومهم بعد ماتخرجوا من هادي التخصصات العلمية اللي تهم البلد ولهم أكتر من سنوات طويلة وهما بيدوروا على وظائف عشان ياكلوا لقمة كريمة في بلدهم لكن للأسف كل وزارة بترميهم على وزارة تانية يعني ما في خير لا في وزارة التعليم ولا في وزارة الصحة ولا في وزارة الخدمة المدنية وضاع العمر يا ولدي، قصد تعالوا نشوف إيش بتقول الرساله اللي كتبتها طالبة من طالبات الكيمياء الحيوية، إنت يا عمو عاجبك ده الحال أنا وزميلاتي وزملائي متخرجين من هادي الأقسام لنا أكتر من خمس سنوات ولا لقينا وظائف ونحنا عندنا شهادات في التقنية الحيوية والكيمياء الحيوية رغم أنه لما تدخل على موقع الجامعة وتشوف المجالات اللي ممكن نشتغل فيها مكتوبه بالبنط العريض وبعدين السؤال اللي يسدح نفسه ليه فاتحين هادي الأقسام ويخلونا ندرس ونتعب وندخل مختبرات ومعامل ونسوي أبحاث وتجارب عشان بعد ما نتخرج يكون مصيرنا في البيوت كانوا قفلوا هادي الأقسام واستراحوا وريحونا من الهم والتعب اللي عشناه، سنوات طويلة ونحنا بندرس وفي النهاية ما يكون في مخرجات للتعليم اللي تعلمناه من جد شي يوجع القلب ويجيب الاكتئاب، صدقني يا عمو في ستة مجالات موجودة على دليل وموقع الجامعة والبلد محتاجة يعني نقدر نتوظف في مختبرات وزارة الصحة والمستشفيات الخاصة والحكومية، ونقدر نتوظف في مصانع الأدوية والعقاقير، ونقدر نتوظف في مصانع الأغذية والزيوت والصابون والمنظفات ونقدرنتوظف في هيئة المواصفات والمقاييس ومختبرات الجودة النوعية، ونقدر نتوظف في محطات تحلية المياه ومصلحة الأرصاد وحماية البيئة، ونقدر كمان نتوظف في كل مراحل التعليم من الابتدائي للثانوي هدا بالنسبة للمتخرجين من الكيمياء الحيوية يا عمو، أما اللي متخرجين من التقنية الحيوية فحدث ولا حرج زي ما بيقولوا ومصيبتهم أكبر من مصيبتنا لأنه مجالات التوظيف عندهم أكتر مننا وبرضو مالقيووا وظايف ولهم سنين وسنين وهما عاطلين ولا في حتى اهتمام بتخصصاتهم العلمية اللي اتخرجوا منها وهادول يقدروا يشتغلوا ويتوظفوا في أماكن كتيرة زي المستشفيات للكشف عن الأمراض الجينية، ويقدروا يتوظفوا في مراكز البحوث الطبية، ويقدروا يتوظفوا في مجالات الكشف عن هوية المجرم عن طريق DNA ، ويقدروا يتوظفوا في وزارة الشؤون البلدية والقروية، ويقدروا يتوظفوا في وزارة البترول والثروة المعدنية للتخلص من التلوث البترولي ومشتقاته، ويقدروا يتوظفوا في مجالات تحسين الكائن الحي من حيث القضاء على الأمراض الوراثية، ويقدروا يتوظفوا في مجالات المحافظة على الصحة العامة، ويقدروا يتوظفوا في مجالات تحسين الخدمات الصيدلانية والإنتاجية والغذائية والزراعية والبيئية والمحافظة عليها، ويقدروا يتوظفوا في مجالات تسخير الخلايا والكائنات الحية أو مواد منها أو تعديل أو تحسين أي منتج معين، مجالات كتيره يا عمو نقدر نتوظف عليها لكن للأسف محد راضي يقبلنا نقدم أوراقنا على وزارة التعليم بيرفضونا، نقدم أوراقنا على وزارة الصحة برضوا بيرفضونا، بنقدم أوراقنا على وزارة الخدمة ووزارة الخدمة زي منت عارف يا عمو يومها بعشرات السنين، نقدم أوراقنا على المستشفيات الخاصة برضوا بيرفضونا رغم إنه اللي ماسك هادي الوظائف جنسيات مختلفة من كل شكل ولون بالله عليك يا عمو مو نحنا أولى من الغريب وإلا اللي ما عنده ظهر ينضرب على بطنه. [email protected] للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة
