جناح الحمامة

هبت هبوب الحزن والحزن مقسوم
للآدمي حتى تطابق عظامه!
وأنا اتنفس منه، لو كان مسموم
واللي يشمه ما يشم السلامه!
يام اعيش بخير، وأيام مهموم
واللي مطيحه صعب، يصعب مقامه
كم لي وانا في خاطري زحمة علوم
وكم ليل ضيعني تشابك ظلامه
ما نيب في ذله ولاني بمعدوم
أملك وجه، لكن بدون ابتسامه
ابعد لزوم ان جيت له شبه ملزوم
اقرب لراسي من خيوط العمامه
لو ان قلبي ف..آخر الوقت مظلوم
زودت حمله لين ضاع اهتمامه!
حوله حمام يحوم واشواقه تحوم
حر، بلا برقع لمح له لثامه!
لا اقبل على اللي شافها اقبال محروم
نتفت حبه من جناح الحمامه
مابيه يرجع لي من الحب مصدوم
ولا ابيه يفقد ف.. القلوب، احترامه
ماله ومال الشك والخوف واللوم
وصمت يرده لايكمل كلامه!
يبقى بقفص صدري مقدر ومحشوم
مقيم وآمله دوام الاقامه
وانا بفصلّي من احلامي هدوم
من خام صبر، ومن خيوط الصرامه
والله ما اغبط غير من يقضي اليوم
من البيت.. للمسجد.. لمبنى دوامه!
ولا الحياه ظروفها دايم الدوم
خلف الحزين، وفوق راسه، وامامه!
قلبي قبل (20) ماهوب موسوم
واليوم له في كل قفله، علامه
الحزن ماهو اللي يردك عن النوم
بالعكس انا لاشان يومي آنامه
لكن ياعمري تريح ومخدوم
لاتلحق أيامك عشاني ملامه!
وان كان لي فرحة تكفي لها يوم
ياربي اجعلها ليوم القيامه!
عفاس بن حرباش