ليته سكت

ماكل دخان في المجلس يجيله قبول
من قال دخان عود الطيب مثل البكت
ولاكل قاف سمعته قلت ليته يطول
قيفان ماهزت إحساسي ولاحركت
ولاكل راعي سوالف ملتزم بالأصول
كم سالفة من خيال الراوي تفبركت
يا مضحّك الناس مايطري عليك الفضول
الناس تضحك معك وإلا عليك اضحكت
إن كان منته بقايل شي يملا العقول
الصمت خير إلك من ترديد بعض النكت
محد بقايل لراعي الصمت ليته يقول
لكن كم قيل للهراج ليته سكت
وياشاعر صرت من دنيا الهوى في ذهول
دنيا الهوى شربكت دنياك وتشربكت
ماتهرج إلا عن الفرقى وظلم العذول
وقلوب تشكي لها وقلوب منك اشتكت
لو القصايد تقدم للقضايا حلول
ماكل ساعة نزف جرحك وعينك بكت
في سكة الوهم ماتلقى محطة وصول
كم ضيعت ناس قدامك وناس اهلكت
قبلك ترانا مشيناها طلوع ونزول
سقنا الركايب بدرب الجهل لين بركت
حتى وصلنا بعد مرت علينا الفصول
لنهاية الصيف وايام الخريف اوشكت
من هرجنا ويش مكسبنا بعد مانزول
ياما حكينا وياما الناس عنا حكت
والهرج من دون قال الله وقال الرسول
جسم بلا روح لو ان العقول أدركت
عبد الله الطلحي