آهات روحانية

مكة وصوت الطهارة منك يفوح
يافرحة المؤمن وقبلة صلاته
جيتك من الذنب مكبوت ومبحوح
شاعر تضيق الشوارع من شتاته
وده بسجدة نهاية رحلة الروح
يختم بها ما تبقى من حياته
دنياه ما عاد فيها أي مصلوح
يحقق أبسط طموحات أمنياته
كم مرت الأزمنة تهدي له جروح
حتى غدى الجرح من أبرز صفاته
وش يعني البوح للي خانه البوح
وصكت دروب التفاؤل من جهاته
إلا أنه يخايلك يا برقٍ يلوح
على بلاد ترك فيها وصاته
ويغرق مسا الليل بالدمعات والنوح
ويلملم آهات روحه في صلاته
عبد الله الطفيلي