مشكلتي ومصيبتي أني ما بكتب إلا في الأسبوع مرة عشان كدة ما أقدر أعلق على بعض الأخبار والتصاريح إلا بعد ما يمر أسبوع زمان، وبيني وبينكم يوم الأحد اللي فات كان في خبر منشور في هادي الجريدة، خبر بصراحة يستاهل مليون ريال، الخبر بيقول «رجل أعمال يكوش على حي كامل مساحته بس مليون متر مربع وبصك وهمي» حي كامل يا لطييييييف، يعني مو قطعة أرض موجودة في وسط البلد أو قطعة أرض، المفروض تكون حديقة أو مدرسة وكان يبغى يطبق عليها.. يا ساتر يا لطيف إلى هادي الدرجة وصل الحال عند بعض الناس.. إلى هادي الدرجة صارت الفلوس تعمي الضماير والقلوب، يبغى يكوش على حي بكامله وبصك وهمي والناس ساكنة فيه من 16 سنة إلى هادي الدرجة أخينا رجل الأعمال ده ذمته واسعة بالله عليكم بأي وجه حيقابل ربنا سبحانه وتعالى يوم الحساب، يارب رحمتك وعفوك، لكن المصيبة مو هنا، المصيبة في بلدية بريمان اللي ما قصرت ومن يوم ما جاتها الأوامر من رجل الأعمال ده إلا وحركت البلدوزرات والتركترات عشان تهدم بيوت الناس الغلابى اللي ساكنة في ده الحي من 16 سنة، كان رئيس البلدية والطقم اللي معاه يبغى يشرد أهالي الحي كلهم لجل عيون رجل الأعمال يا سبحان الله، رئيس بلدية ينفذ أوامر رجل أعمال من غير ما يروح يسأل ويستفسر عن حكاية الصك المزور اللي معاه هدا بيدل على أنه وراء الحكاية إن وأخواتها هدا غير إنه رئيس البلدية ما تحرك عشان ينفذ توجيهات بإزالة تعديات حكومية لكنه اتحرك برجاله وعتاده عشان يهدم البيوت على ساكنها بعد ما أخد الأوامر من رجل الأعمال يا رب رحمتك وعفوك ما يكفي اللي حصل من المصايب يوم الأربعاء الأسود ما يكفي التلاعب اللي صار؛ مساكن ومخططات قامت على مجاري أودية وراح فيها ناس يا كترهم يا لطيف من هادول الهوامير صاروا زي الفيروس المميت يهددوا حياتنا ومجتمعنا وعلاقتنا مع بعضنا البعض ولازم نوقفهم عند حدهم وإلا حيكون مصير أراضي الناس النهب ومساكنهم الهدم لأنهم خلاص صاروا معدومي الضمير والإنسانية، لكن الحمد لله قدر ولطف، المحكمة ما قصرت وقامت بواجبها تمام بعد ما اكتشفت انه الصك اللي كان حيشرد كل أهالي حي الأطلال واللي شايله رجل الأعمال طلع مزور ولولا لطف الله ثم المحكمة كان أخينا رجل الأعمال طبق على الحي وشرد أهله وسكانه عشان كده بقول وبالفم المليان اللص حيفضل لص إلا إذا لقي العقاب الرادع والحاسم اللي يستاهلوو عشان لا يفكر لا هوه ولا غيره بسرقة شبر من أرض مو سرقة مليون متر مربع ويا رب عفوك ورحمتك ورضاك.. وعيشووا كتييييير تشوفوا كتييييير [email protected] فاكس: 6764070 للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
