كبرياء الحب

يا صاحبي يا أغلى من الألماس في العقد الفريد
يا أول محطات الوله وآخر محطات الغلا
لك في خفوقي شي (ن) أكبر من تعابير القصيد
يكفيك لا من صرت لأحلام الفكر شرب وكلا
زرعت فيني بذرة أشواقك ونا الحر العنيد
وروضت فيني كبرياء الحب وأسكنته على
قمة جبال العشق من طيبك وذوبت الجليد
يوم أشرقت شمسك عليه وفاض نهر من الحلا
نخل المشاعر من رطبها ميلت خضر الجريد
قطفتها لك حسب ذوق الشعر وأقلط يا هلا
إن كان ما حبر القوافي نزف من دم الوريد
ما تستحق اتشوفها بالعين يا ريم الفلا
ونا قصيدي رمح بن غانم وسيف ابن الوليد
لكن عن ذكراك لا يدله ولا قلبه سلا
ما مر به ساعة وهو ما عاد عهدك من جديد
يعلن بها عشقه لذاتك وانتمائه والولا
تبغى الصراحة.. والكلام العذب.. والعلم الأكيد
الرجل يا يعشق عيون الغالية والا فلا
ونا عشقت أم الغلا والحسن والنظرة بعيد
نظرة عيون الشعر وأعلنها على روس الملا
إحساسك أصدق لي من البسمة على الثغر السعيد
يا من تعلا فوق هام السحب قدره واعتلا
يا عيدي اللي مختلف في ناظري عن كل عيد
لا عاد تطري طاري الفرقا ترى الفرقا بلا
خذني معك لآخر محطاتك وسكني وحيد
بين الورود وصادق إحساسك ونسمات الخلا
سعد الله الخلاوي