أصعب سؤال

يشهر بي الهاجس سماء وأوقف على حد الخيال
أوقف على حد الخيال وحالتي يرثى لها
لأن القصيدة حملها ما يقدره حتى الجمال
ولا لي على نظم القصيده حيلة واحتالها
جتكم (على ما الله كتب) وانا تعبت من الثقال
اذا وقفت احطها واذا مشيت اشتالها
دام القصيده فالنبي رمز الطهر وافي الخصال
ليت القصيده تستحي لا قيل من هو قالها
وشلون أبمدح من كمل وصفه ولله الكمال
الوصف يقصر والقصيده لو تطول طالها
الله تكفل في مديحه في كتابه ذو الجلال
وقول الله اصدق بالمديح من البشر واقوالها
يا سيدي احمد خجلت من القصيده والمقال
يخجل اذا جت سيرتك وانت الفصاحه حالها
يا اشجع نبي وافصح نبي واكرم نبي جاله مجال
بين الامم سيرته عطره والشرف يبرالها
بتوراة موسى ذاكرك ربي بوصف لا يزال
حتى بعثت وخابت ظنون اليهود بآلها
وفي مدحك الله ضارب بأنجيل عيسى اروع مثال
يا معجزة كل البشر يا نورها وظلالها
يا نعمة واجب علينا شكرها في كل حال
يا متمم اخلاق البشر واقوالها وافعالها
من مولدك طفل يتيم وعايش بين الجبال
الله وهبك المعجزات ادقاقها واجلالها
تسجد لك اشجار وغمام الخير يتبعك بظلال
وصار القمر نصفين والنظره سبب لأهوالها
يا مغير تاريخ امه عايشه ذل وضلال
يا ناصر الامه بعد ذلت بسوء اعمالها
الذل والفتنه وشرك الله واشياء ما تقال
من قبل تبعث والعرب يا سيدي ذا حالها
حتى بعثك الله وبينت الحرام من الحلال
والعُرب سادت من يمين الارض لين شمالها
الله يجمعنا معك يوم الحشر يوم الهوال
في ساعة تنسى الاوادم مالها وعيالها
شفاعتك يا سيدي اكبر منى واشرف منال
شفاعتك يا سيدي ما خاب من هو نالها
جتكم على ما الله كتب وانا عودت لاصعب سؤال
ليت القصيده تستحي لا قيل.. من هو قالها؟