الجواب العاطفي الأول

بوابة يناير
حبيبتي نقط ..تحية طيبة وبعد
أنا لا أتجاهل،أو أتحدث عن حبيبة غيرك، أنا أتحدث عنكي
بعد أن قررت أن يكون أنسب اسم ليكي هو نقط .
أصل إنتي الحياة ، والحياة شوية نقط
نقطة نظام لما الصفوف اتبعترت وانتي اللى رتبتيهم
نقطة مرور وسط الطابور أول ماشافك اتحرك
نقطة بوليس للمجرمين ،تابوا عشان خاطرك
نقطة تعادل مع فريق إنتي طعم الفوز فيها
نقطة لقاء للمحرومين إنتي اللى قربتيها
نقطة بقاء بعد اللقاء إنتى اللى طولتيها
نقطة دم ساعة الجرح إنتي اللى وقفتيها
نقطة دموع ساعة الحزن إنتي اللى نزلتيها
نقطة رجوع ساعة الرجوع بتتأخر
نقطة نهاية الكلام لما إنتي قلتى طب سلام
نقطة اللى هي shift " ز" على لوحة المفاتيح
نقطة وقوف عند الغلط علشان مفيش تصريح
نقطة كسوف لما قلت لك بحبك
نقطة حروف فوق الحروف أو تحتها ..
ونقطة جوا قلب الحرف - أقصد يا حلوة ال "الج يم"-
ونقطة لسه بتتولد إنتى اللى هتسميها
نقطة فرح لما الفرح قدم على الهجرة
نقطة مية من مدرب للعيب خبرة
نقطة حصار مابتعديش حد غيرك
نقطة دوا للعيانين
نقطة هوا للمخنوقين
نقطة عرق.. من أشقى أشقى الشقيانين
نقطة تجيب النقطة ..ونقطة للرقاصة
ونقطة للفرقة اللى بتطبل وقالوا سياسة
ونقط كتير أنا مش عرفها إنتى اللى عارفها