لآلئ شعرية

حبيب القلب سامحني انا آسف قفلت الباب
تركتك تنشد العالم وتسألهم عن أخباري
انا ما ودي نتفارق ولا ودي يطول غياب
ولكن حدني وقتي وما لي بالنوى طاري
انا أدري عيشة الغربه مدينه أهلها اغراب
وتراك بدنيتي شمعه تشتت حيرة افكاري
ومهما طالت الغربه ترى نبقى اهل واحباب
ويكفي عندي اسرارك وعندك غالي اسراري
انا واثق اذا مرك نسيم الليل بالأطياب
تبي تبكي من الذكرى وتشرب دمعك الجاري
انا هذا قدر عمري ولا تسأل عن الأسباب
اذا طال النوى تدري وش اللي طول أسفاري
انا ما انسى بدايتنا ولا انسى قصة الأعجاب
و ذاك الليل ونجومه تضوي دارك وداري
عشقتك موت ياعمري وقلبي في المحبه ذاب
ولكن ما تجي القمرا على ما يشتهي الساري