أهل المكارم

رثاء في الشيخ مبارك بن عسكر الهاجري (رحمه الله)
الله يجبر عزانا فيك يا مبارك
فقدك علينا كبير وموتك مصيبه
ينعاك من سمعك بك من كبر مقدارك
والحزن مع كل فج ارسل مناديبه
اربوعك وعانيتك وضيفك وجارك
تنعاك حتى المره والورع والشيبه
يا للي مع اهل المكارم شاعت اخبارك
جمعت ما بين حسن الخُلق والهيبه
اي والله انا نحبك والله اختارك
والموت سنة ولا احدٍ يعلم بغيبه
عسى في جنات عدنٍ شامخٍ دارك
يا راعي المجد والطولات والطيبه
لو انك تشوف من شيع ومن شارك
عرفت من هو مبارك عند اصاحيبه
يا رب حرم على وجه الرضا نارك
حنا شهودك على ارضك وانت تدريبه
شهرٍ مبارك وضافك عبدك مبارك
والعفو واللطف منك الناس ترهي به