ابراي لله

من هو يبيع الصبر واجيه شرايه
ادفع ثمنه بسخا وافديه بعيوني
يوم الجسم ناحلٍ والوقت برّايه
يبري صويب الحشا لا صار مطعوني
ازريت اخبي الهوى و الناس قرّايه
تقرا النظر والبحر لاجت به اشجوني
يبقى قناع الفرح دنياه عرّايه
عرّت وجوه الحزن في لحظة سكوني
صارت جروحي تغطرف بايدها الرايه
لصفر العراقيب تشبه م استحت دوني
ابراي لله يا قلبي منْه وابرايه
من واحدٍ ما جهل همٍ على متوني
يعلم وعنده كياسة.. عقل ودرايه
لكن توانى والادهى باخل بعوني
وجهي شحب وانرسم حزني بالمرايه
وانا على مذهبي لو هو بهت لوني
دامه صمل ع الجفا خله على رايه
بعيش دونه مدامه عايشٍ دوني