اللغز

كان كاتب اللغز الماضي الشاعر محمد بن جروح الصقري الشمري من التربية بحائل الذي يقول:
انشدك عن رجل مهم سكن جال
تشوفه بعينك قبل مايمسي الليل
يفرق على غيره مثل فرق الاجبال
وتروا سميه مجمع للرجاجيل
والحمد لله بدل الحال من حال
عن وقتنا الاول وقل المحاصيل
وقد توصل للحل شعرا :
محمد الصقري كتب زين الامثال
يامرحبا به عد ماتجري الخيل
الحل نجم بالسماء يشعل اشعال
سميه سهيلي وهو يطلع سهيل
علي رشيد الرشيد - رياض الخبراء
يامرحبا باعداد ماهل همال
باللي كتب لغزه ويحتاج تحليل
حله سهيل النجم ياطيب الفال
والاخر سهيلي ملم الرجاجيل
احمد بن ناصر المحرج - الرياض
سهيل وظل سهيل ياطيب الفال
والظل نجلس به قبل يمسي الليل
والظل مجلاس الرجاجيل واشبال
هذا الجواب اللغز من دون تحليل
محمد ابودحيم العريني - البدائع
اللغز يامحمد على راس ماطال
ويامرحبا بك عد وبل الهماليل
حله سهيل وياصلك عبر مرسال
سميه سهيلي مقر الرجاجيل
فالح غازي الحربي - رياض الخبراء
اهلا هلابك عد ماهل همال
واعداد ماينزل على الارض من سيل
اللغز حله بالسماء مابه جدال
يطلع جنوب ونعرفه باسمه سهيل
سهيلي سميه للاواليد ورجال
يالله عسى حلي وصل وافي الكيل
طلال الرشيد - الجبيل
اللغز حلة مشغلن كل حلال
لغزن ثقيل ويلزمة زود تحليل
الرجل صح السهيل مايبغى جدال
والظل هو الظل من شمسة أميل
سعد صنهات السهلي الدرعية
ياماحلا المكشات والجو لاسال
يبدأ براد الوقت من طلعة سهيل
يقصر نهار اليوم والليل ذا طال
الشمس تشرق واضح الشرق بالميل
لغز الخزامى واضح الحل يارجال
سجل جواب اللغز بالفي وسهيل
عبدالمحسن بن محمد المحيسن
- رياض الخبراء
لغز الاسبوع
يكتبه للصفحة الشاعر علي رشيد الرشيد من رياض الخبرا ويقول:
انشدك عن رجل مقدر ومحشوم
في كل ديره منزله فوق مشراف
كلن يعرفه للبشر صار معلوم
في وسطه المفتاح بالعين تنشاف
نستقبل الحلول على البريد الالكتروني
rb-khozama@alriyadh.com
أو الفاكس 014871070
كما نرحب بطرح الألغاز الجيدة
وننوه بعدم المشاركة الازدواجية بين اللغز وصوت الصورة واختيار احدى الزاوتين.