بنى الدولة من الجال للجال

انا فدا موطن يقودونه رجال
ماضي على الحق القويم المبينا
حكامه آل سعود بانين الاجيال
منهم تعلمنا الصعود ورقينا
خدام بيت الله راهين الافضال
من جودهم ياكم بسطنا يدينا
اسلم يابو متعب على نهج الابطال
بالعز من هيبة جنابك روينا
مليكنا وجه الزعامة والاجلال
ياعزنا وحجانا لا نتخينا
خلفك ولي العهد سلمان بالحال
يعني الوفا منا ويرجع الينا
ومقرن يطيب بطيبه الحال والفال
طلنا بكم روس القمم واعتلينا
سلام ياروس المكارم والافعال
حكامنا وافضالكم تحتوينا
يانسل من حكمه ضرب فيه الامثال
وبعنا بظله بالرغد واشترينا
من قبل حكمه فقر وشرور وقتال
وفي في كل ليلة ضيمنا يحترينا
لا دين يجمعنا ولا راي فصال
وابليس بانواع الفتن مبتلينا
الشر متعدي على النفس والمال
والى تعاهدنا سنة ماوفينا
وصرنا بعد حكمه على قلب رجال
وتلملم شتات الجموع وصفينا
ماعاد نشكي ضيم والخير نزال
وسقنا البشاير بعد ماصار فينا
اللي بنى الدولة من الجال للجال
وعلى يده ساد النماء وعطينا
عبدالعزيز اللي رسم خط مامال
عليه سيرتوا الامور ورسينا
دستوره القرآن في كل الاحوال
لذا على جل المكارم ربينا
الشعب كله درع وسيوف وارتال
دون الوطن واللي يجينا يجينا
ندعس على روس الزلايب والانذال
وعن بوقهم وطبولهم ما درينا
خسران يامعاند بحر حط في البال
وان كانها بالطيب مرسى ومينا
الريح ماطرت ولاهزت جبال
وان قالوا آل سعود اغزوا غزينا
الله يخليهم لنا ذخر وضلال
يامحكمين الشرع فيكم رضينا
انتم قوام المملكة قول وافعال
وحنا لكم ياروس نجد انتمينا
فيصل الباهلي