غرايسٍ يا زينها طلعة سْهيل

صور شاعرية

ياعل وادي المجمعة للمطافيل
وأبا المياه عْلاوته والسفاله
ويمطر على هدب الغْرُوس المظاليل
يحِير سيله في النخل والْحِياله
ووادي الفِقي زين البساتين ونْخيل
في القيظ يسقي صافيٍ من زلاله
كدّادهم كنّه على ساحل النّيل
تِسمن معاويده ويكثر رياله
يرجع سدير ويكثرن المحاصيل
تلقى به التاجر يْنمّي حلاله
غرايسٍ يازينها طلعة سْهيل
يفرح بها اللّي جايعينٍ عْياله
للأجنبي والجار فيها مداهيل
خشرٍ ليالي القيظ من لِه وْماله
شعر: إبراهيم بن جعيثن (رحمه الله)