صوت الصورة

يا راعي البل شطّرها
عن الطريق الذي ماشي
حافظ عليها وسبّرها
ﻻ يفقد اليوم لك حاشي
حولك نفودٍ وحدّرها
ترى العوض مايجي كاشي
حمد عبدالله الوايلي -
حوطة سدير
البل عطايا الرب خلو لها الدرب
بالهون سوقوها لحفل المزايين
وقتٍ مضى وسيلة السلم والحرب
واليوم يا أهل الطيب ردوا لها الدين
مع زادها والشرب والراعي الذرب
يرعن فيافي نجد ماهن مساجين
فهد عقيل الطويان
- بريدة
الخط مشغولٍ بذود البعارين
والناس تاقف لين ينزال الاشكال
وراع الحلال موقفٍ عندها يمين
ولو يندعس واحد مع الناس له حال
علي رشيد الرشيد -
رياض الخبراء
يا زين النياق بين خلفه وخابط
لا مشت على الشارع مرتزّه
كنها صف عسكر والذلول ضابط
في مشيته يا ريح ما يهزّه
ما هي بورصه سهم طالع وهابط
عطايا الله تعز اللي يعزّه
مهند محمد القطيط
ربعت روض القطا والمستجده
وقيظت بالحيد وأطراف الردامي
واستقلت للمزاين مستعده
مرهبه في كسب جايزة الإمامي
بدر الحزيمي
يا ويل حالي كل ما شفت أنا الذود
يمشي على خطٍ مسفلت ومهجور
قمت أذكر الله لا يجي شخص مقرود
يجعل شتاته بين ميت.. ومكسور
درب الخطر يا صاحبي ما يجلب الفود
أحذر ترى منتب على الأخطار مجبور
خالد ناصر المخيمر
- روضة سدير
يا راعي الذود مخطي وين رعيانك
البل على الخط كنه من زرايبها
تسمع وكم مرةٍ شافتهم اعيانك
حوادث السيل والمجهم سبايبها
الارض خضراء يا راع البوش بامكانك
تبعد عن السفلت لا تبلى بمصايبها
سعود عبدالعزيز الهزاع
- نعام
تتابعت بالدرب حرش العراقيب
الحيا والعشب هو همّها
من سكةٍ خطره عسى لها الطيب
والبل تنومس من ضمّها
يمينها جيبٍ وبيسرها جيب
بالقلب يرعوها وشالوا همّها
سعود عائش الحربي
يوم شفنا الذود على الخط مقفين
دعيت ربي عسى الله ينقل خطرها
جيوبٍ تراقبها من شمال .. ويمين
يا ناس هذا طريق اللي تسير بكفرها
هذا الخطر بعينه لأرواح .. ومزايين
كم حادثٍ جاب بأسبابه خبرها
عبدالرحمن أحمد الكنهل
- الرياض
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 0114871070
ونرحب بمشاركاتكم الشعرية وما تلتقطه
عدساتكم من الصور الهادفة والطريفة ..
ويا هلا بالجميع..
صورة العدد السابق