صوت الصورة

يا ما حلا النعسه على حفّة الشاص
في بطن وادي والطعوس الجميله
البال مرتاحٍ بعد صيده بمقناص
جنّب ونيته وأنسدح يا حليله
عبدالعزيز مقبّل البشاري - الرياض
نايم على الصدام وناسي همومك
مستانسٍ في ظل جواً برادي
متلفلفٍ يا صاحبي في هدومك
ما همّك اللي جاي من كان غادي
لا واهنيك غارقٍ في حلومك
ناسي السياسه والمشاكل أبعادي
خالد ناصر المخيمر - روضة سدير
صورة العدد السابق
يا راعي الجيب ويش الذي جاك
لا تحسب الصدام وضع الرقادي
هي ضاقت الدنيا أوطال مسراك
هذا التصرف بدعةٍ غير عادي
عبدالله الحامد الشريف
نومه هنية والحذر لا تصير عاده
تحتاج راحة والنتيجة خطوره
شف موقعٍ فيه الهناء والسعاده
رسالةٍ يا فاهمين المشوره
وقت الشتاء فيه الصعوبة براده
شف لك مكانٍ دافيٍ به حروره
ريان محمد الخنيفر - الرياض
من التعب طحتا على جال صدام
وغفيت نومه ما بها شك واجدال
بس الحطب ممنوع في سر وإعلام
وأنته شحنت الجيب شديت بحبال
راحت حياتك تطرد الرزق بأحلام
عيشت جهد يا صاحبي تجهد الحال
حمد عبدالله الوايلي - حوطة سدير
الله يستر من حسودٍ وملقوف
ما جاه علم إن الحطب مانعينه
مبدا الكرم لا من لفا داره ضيوف
ركا الدلال وشب ناره بحينه
ورزقٍ لمن حدّه على جمعه ظروف
عن حاجةٍ تجبره للناس شينه
غنام مسعود القريني - نعام
ترى الحطب ممنوع والناس تدري
نومه هنيه فوق صدام جيبه
طول النهار النوم والليل يسري
خايف من التفتيش يمكن يجيبه
جيب الشنب والدرب رمل وبري
مصنوعة اليابان صنعه رهيبه
عبد المحسن محمد المحيسن. رياض الخبراء
شرح الصور يتبع الإفهام
ويمكن يصل معاني خمس
بالشاص جمع الحطب أكوام
اليوم أو ما جمع بالأمس
والنوم في قسمة الصدام
خيار بعد الجهد والعمس
سعود عائش الحربي - جدة
نايم على صدام جيب (....)
يخاف تظهر من ذا الاشجار حيّه
هوايته في البر وفجوج الصحاري
والحوض عباه الحطب في ضحويّه
سعود عبدالعزيز الهزاع - نعام
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 0114871070
ونرحب بما تلتقطه عدساتكم من الصور
الهادفة والطريفة .. ويا هلا ومرحبا