النية مطية

الحياه إلها دروب مهمهيه
والشّكاله ما تهيا للهدانا
لا تعيش الوقت مجهول الهويه
عزّ نفسك لا تنزّلها الطمانا
عاشر اهل الطيب ورجال الحميّه
خوّة اهل الدين واطوال اليمانا
والنميمه خلّها هذي خطيّه
دربها شين ولا فيها ضمانا
كيف تطعن عرض غيرك بالاذيّه
خل عندك عقل واعي مع ذهانا
في حياتك لا تفكّر بالرديّه
الردي من هرجته دايم يبانا
اختر اجزال الهروج اللي نقيّه
لا يجي في هرجتك زلّت لسانا
صف قلبك في صباح وفي عشيه
وانتبه للوقت وظروف الزمانا
لا تبدّل نيتك ابسوء نيه
الرجل لآمن خطا لازم يدانا
لو تخفى كاشفك رب البريه
الله اللي خالقك رافع سمانا
والفجوج اوساع والنيه مطيّه
حث رجلك للمراجل لا توانا
محمد مرزوق السميري - الرياض