الاسبوع الماضي كان بيت الاسبوع حول مقترح الاخ فهد المهوس عن الاخطاء الطبية الفادحة في المستشفيات ارسله للصفحة الشاعر علي آل زولان الفيفي من بيشة ويقول: ياكثر الاخطاء كل يوم ضحية تكفون ياهل الشان راحن الارواح وكان الصدى من الشعراء مافيه حزم في مجال القضية كم واحد باسبابه اهمل وذا راح النفس اللي ازهقوها برية من الجهل راحوا وهم اول اصحاح اللي جنى يبغى قيود قوية يدفع غرامه مايراعى ولو صاح علي رشيد الرشيد - رياض الخبراء ياهل المعرفه ناس صارت جريه قامت تطبب وزادت الجرح بجراح وكل تفرج قام يضرب تحيه مافادت الشكوى ولافادمن صاح عام على عام تزيدالخطيه والله يرحم من تشافى و ثم طاح حمد عبدالله الوايلي/حوطة سدير هذا خطا كل الخطا والخطيه دكتور كم جراح بثياب سفاح قوله يموت ايموت انا وش عليه الله هو اللي يعلم بنزع الارواح والصيدلي شغله ترى الصيدليه ولا كل جراح يقولون جراح سعد صنهات السهلي الدرعيه كم من مريضٍ مات والنفس حيه ماتت على ما قيل افلان قد راح ماتو بشر صارو للاخطا ضحيه والعذر بالانفس مايبري جراح لازم تشوفون الوضع والقضيه هذي حياه أو موت ماهيب بامزاح راشد الورثان - الأفلاج عقوبة من اخطى فالوزارة ردية خصم من الراتب وهو عاد مرتاح كم من مريض مراجع الباطنية وعقب الجراحة فالبطن شاش جراح حتى الدواء لي صرف من صيدلية لي جت خصوصي يكثره لجل الارباح سعود بن عبدالعزيز الهزاع/ نعام بعض المشافي عندنا عالمية لاجيتها في شكلها النفس ترتاح والمشكله كثر الخطأ والخطية غلطة طبيب كثرها اليوم ياصاح ترى الخطأ بالطب وصمة قوية كم واحد مفقود كم واحد راح عبدالمحسن بن محمد المحيسن - رياض الخبراء يا ربِّ ترحم من خذته المنيّه عوِّض على اللي منه عضو غدى وراح ما قلت في حرب إصابة شظيه لكن خطا دكتور واهمال جرَّاح مستشفيات في المباني عليه واللي بداخلها يبي حزم واصلاح نبغى من المسؤول لفته قويه تحفظ حقوق الناس وتصون الارواح ناصر بن جمعان آل عوض - وادي الدواسر توكد من هل الشهاده قويه اخاف حصلها يبي جني الارباح تجي النتيجه في زياره خفيه في حزتن محدن تضاهر بالانصاح اما لقيت الصدق ولا وخيه المسأله مهيب ساعه وترتاح مشعل غنام القريني - نعام رحنا ضحايا غلطه مطبعيه ما بيت دكتور مزور وسفاح شهادته واسمه وحتى الهويه اكبر مزور عندنا صار جراح وين العقول الناضجه والذكيه اللي لهم في المجتمع دور واصلاح مبارك محمد آل معمر كلٍ على ما قال ما فيه زيه لاشك شي زاد يحتاج لافصاح في كل يوم نسمع أخطا وضحيه أحد شلل وأحد قضى نحبه وراح مستشفيات راقيه بس سيه من كثرة الاخطاء وفقدان الأرواح مبارك بن محمد الدوسري با الله وش ذنب النفوس البريه اللي وضعها الحط في يدين جراح بين الشفا واثره هدف للمنيه قالو خطى طبي ولا مات بسلاح قضى وقدر والامر غصبن عليه لا ون يومه ما وقف كان ما راح غنام مسعود القريني - نعام يا رجال يا أهل الطيب يا أهل الحميه ردوا علينا عاجل لاجل الاصلاح بأخطائهم كم نفس راحت ضحية وغلطات بتليها تطابيب جراح كم من مشاكل سببوها وقضية قلنا طبيب وأصبح اليوم سفاح محمد بن عبدالعزيز الخنيفر - أشيقر واجب على أهل الشان منع الأذيه والأمر لا منه وصل حد الارواح راع الخطا طبيب أو تمرجيه لازم يحاسب حتى الانفاس ترتاح واقول في وضوح مع أريحيه كل قفل (ن) له حلول (ن) ومفتاح سعود عائش الحربي بيت الاسبوع تجاوبا مع مقترح الاسبوع الماضي للاخ عبدالعزيز الغازي من الرياض لموضوع صعوبة الحصول على سرير في المستشفيات الحكومية.. ارسل للصفحه الشاعر مبارك بن محمد طرجم الدوسري من وادي الدواسر هذا البيت مشكله ياناس وحلول بطيه المريض يموت ماحصل سريره نستقبل صدى هذا البيت بثلاثة أبيات فقط تدور حول هذه القضية الهامة ويفضل الإرسال عبر الإيميل [email protected] او على الفاكس ( 4871070 / 01 ) مقترح لموضوع بيت الأسبوع القادم ارسل للصفحة الأخ سعد العبد المحسن مقترحا لموضوع بيت الاسبوع القادم وهو وجوب الحذر من التواجد في مجاري السيول وبطون الأودية اثناء خروجهم للتنزه والرحلات البرية وخاصة موسم الامطار.
