يالله عسى منزله روضة بساتين

يالله يا جابر قلوب المصابين
تجبر قلوب صابها موت نايف
راح الزعيم اللي يدك الميادين
جلاي عسرات الظروف الكلايف
عوق الخصيم اللي رفع راية الدين
الين عنزها بروس النوايف
غيث اليتامى والضعوف المساكين
ومروي الكبود الضاميات اللهايف
خلد لنا عز من اول وذلحين
في كل حال اعلام عزه رفايف
يالله عسى منزله روضة بساتين
خلد الجنان اللي ثمرها خرايف
لو القلوب من الحزن حالها شين
واعياننا منها المدامع ذرايف
حن كلنا نايف كعام المعادين
اللي على الافساد صاروا طوايف
نثبت مع الحكام في العسر واللين
قدام في قدام مابه نكايف
اللي على عز الشريعة محامين
وراعا الردى منهم على طول خايف
مادام حن حيين وافين وافين
وقفة وفاء ماهي بوقفة مزايف
فلاح بن سعيد بن حمد الشدقاء