غوادي

ما أبكي على شي في دنياي لو غالي
من طبع دنياي فيها اللافي الغادي
والبال ما أشغله بهمومي ولا ابالي
ما دام موتي انكتب من قبل ميلادي
لكن ما اركن إلى الراحات بآمالي
أوطى الوعر وألجم الخياب حسادي
من يطعم المر يدرك لذة الحالي
شروات من ذاق عذب الماء وهو صادي
ومن لا يثابر صفق كف الحسف خالي
وتعوض القيد عقب الحيد والحادي
ومن لا يبادر صعود الشامخ العالي
ما شاف عزه مثل صاحبه متبادي
وانا على العهد ما بدلت سربالي
ثوبي لبسته على ما لاق لاجدادي
من روح موالهم جريت موالي
من ينطح السيح عقبه ينحر الوادي
منوالهم ما تغير عنه منوالي
مالي من المال الا شربي وزادي
تبطي الدراهم تغير ربعٍ أمثالي
ويبطي الزمن ما تغير فيه معتادي
وش فايدة صاحبي من نكسة عقالي
لى ما نفعته قبل لا صوته ينادي
لا خير في مال ما يستر على غالي
المال غادي وانا مثله بعد غادي