شفت الجفا والضيم بالصبر مجبور

ماجور ياقلبي من الهم ماجور
عيا يجنب عنك ما أقسى عذابه
عانيت ياقلبي وتشكي من الجور
وتقول في دنياك شفت الكآبه
وتقضي أوقاتك على راس مشهور
خصاً ليا جرحك تزايد صوابه
شفت الجفا والضيم بالصبر مجبور
لو كان ما بالصبر حيله وجابه
مالك رفيق وتالي الوقت معذور
مادام كلٍ راح يشعب ركابه
ودام أكثر الاصحاب منظر وديكور
مظاهرٍ منها العجب والغرابه
لامكسبٍ طيّب ولا فعل مذكور
جوٍّ خلا بالزيف يطرد سرابه
الخوه اللي مالها بالفعل دور
تصغر بعيني مثل حجم الذبابه
لاصار ماتبنى على ساس وجذور
بيتٍ بلا ساسٍ سريعٍ خرابه
نواف محمد الصخابره