الراحلون

عزي لحالي والديار خلي عقب الراحلين
اللي مضوا درب السفر والبعد طالت مدته
أقفوا وخلوني وقلبي مجزعه كثر الونين
وخلو فراغ فالعمر كل البشر ما سدته
خلوني أبكي بعدهم والهم في قلبي دفين
صكت على قلبي غرابيل الزمان وهدته
صرت أتبع الهوجاس وأسري لا ذكرت الغايبين
كني يتيم ما لقا أمه راح يتبع جدته
ويلاه ويا وجدي عليهم وجد مظلوم سجين
خلوه ربعه يوم ضرب الوقت زادت شدته
خلوه يصرخ ويتطلب ما لقا قلب يلين
ضدوه وأقفوا دون رحمه والصوادف ضدته
أو وجد عود ذره بنيات ما جاله بنين
خارت قواه وطاح معتل وعجز عن كدته
اليا فتح عينه وإلى هن من يسار ومن يمين
هن مالهن غيره وهو كف المنايا لدته
القلب قطعه البكى ونياطه أبلاها الحنين
يسري ويهرب عن همومه والمصايب ردته
يا طول ليلي بعدهم ويا جور دورات السنين
يا ويل قلبي دام سيف الوقت زادت حدته
وعزي لحالي والديار خلي عقب الراحلين
اللي مضوا درب السفر والبعد طالب مدته