اقفيت يابن زابن

هذه القصيده رثاء في الأديب الشاعر/ نايف بن زابن الحربي رحمه الله
ياخال لو إن المراثي يفيدن
والله لا ولف لك من الشعر ديوان
لكن ما غير يحرقن ويزيدن
هموم صدر تشتعل فيه نيران
يا ونتي ما ونها كل من ون
على مثل ما قلت في ماض الأزمان
فجيعة معها الفجايع يهونن
ومصيبة لو هي على آبان ما بان
أقفيت يا بحر الندى يا بن زابن
يا مصدر الحكمه ويانبع الاحسان
ياذخر من صعبن ظروفه وثقلن
ويا عون من لا له بني عم وإخوان
ريف الضيوف مدمر الهيل والبن
وهيف السمان اللي بغالية الاثمان
مربّح اللي للمبيعه جلبهن
لو شان وقته لا تكدر ولا شان
ولا كبرت القاله له الراي الأحسن
حجا ومالجا بالشدايد ومزبان
ليت المنايا دورن عنه يلقن
اللي لو إنه راح ماهو بنقصان
اللي إليا من غاب ماقيل له من
وإليا حضر ماله حضور ولا شان
وإلا ابن زابن بالمفاخر تبين
ولا ني بمحتاج دليل وبرهان
اكبر دليل جموع ناس تلافن
من كل حدب وصوب شيب وشبان
كل على فرقاه ضايق محزن
لو القدر ما يمنعه سيل الأحزان
صابر لحكم الله ومومن وميقن
لا دامت الدنيا ولا خلد إنسان