صوت الصورة

المهرجان اللي حوى تراث الأجداد
في مدخله مدخن علامة هل الطيب
عقب القهاوي للرجاجيل ينقاد
عليه من الجاوي دخون المعازيب
سعود بن عبدالعزيز الهزاع - نعام
المبخر اللي صار رمزاً وتذكار
لأهل الوفا والطيب في كل ديره
اليوم أشوفه يا عرب شوف الانظار
مركون في الادراج محدٍ يديره
طلال بن غارم آل فرحان – الرياض
شوفة المطيب من طياب العوايد
عادةٍ للناس تقدير ومحبّه
شوفة المطيب لها رمز وفوايد
للتراث وشكلها كلٍ يحبّه
قدّمه تقدير لاناقص وزايد
حط به عودٍ ولا خلص فعبّه
مبارك محمد بن طرجم - وادي الدواسر
يا دار لك تاريخ ماضي ومنشاه
لأهل الكرم وأهل الوفا والشجاعه
واليوم له تجديد لاحل طرياه
بجنادريه فيها اجمل بضاعه
حمد عبدالله الوايلي - حوطة سدير
ماهي تراث المبخره يا رجاجيل
حتى انها تنضاف للجنادريه
دايم مع أهل الجود ضمن المعاميل
ومعها النجر محماس والنار حيه
توارثوها أجيال جيلٍ بعد جيل
مواري أهل الطيب ما هي خفيه
فهد بن عقيل الطويان - بريدة
عامٍ مضى واليوم عدنا على خير
تراثنا المحبوب بالقلب مرساه
والقريه اللي تعجبك دوم تطوير
قاموا بها رجالٍ على المجد ممشاه
محمد عبد العزيز الخنيفر - أشيقر
مبخر يشابه بالعلو قمّة طويق
في مهرجانٍ بالوطن هذا مقرّه
يا زين شكله صفة إدلا وإبريق
والضيف يلقى دايماً ما يسرّه
خالد بن ناصر المخيمر - روضة سدير
رمز الكرم بالسعوديه
هالمبخره بالجنادريه
يا الله يا مصلح النيه
تستر على رياضنا الحيه
عبدالكريم عبدالرحمن السلوم - القرائن
المبخره زانت بسيفين بالساحه
هذا وطنا بكل ما يحتوي غالي
الناس تمشي حولها بكل راحه
رمز الكرم يا ناس أول وتالي
سعود عائش التميمي - جدة
هذا التراث اللي له الناس ياتون
بأرض الوطن دار البطوله والامجاد
والمدخن اللي صار رمزاً تشوفون
رمز الكرم .. رمز الأصالة .. والأجداد
بشائر القحطاني - الرياض
صورة العدد تصوير الزميل راكان آل عمار الدوسري
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بالصور الهادفة والطريفة