سلطان خيرك صار للناس عنوان

دمعة غلا مالوم ياناس سلمان
هلت على سلطان قلبه وعينه
هذا الذي وصفه تجمع بانسان
هذا الأمير اللي عسى الله يعينه
هذا الرحوم اللي بكى عند سلطان
عضيده اللي كلنا عارفينه
وشلون ما يبكي على غاليّ كان
هو مهجته هو رفقته هو ضنينه
يبكي أبو خالد وتبكيه عربان
كلن على فرقاه زايد أنينه
مرحوم يا سلطان يا عالي الشان
يامن جبرت قلوب ناس حزينه
سلطان خيرك صار للناس عنوان
خيرك كما بحر يناوش سفينه
أرثيك أنا والقلب مليان بأحزان
أمر القدر يامير يمشي بحينه
عزَاك لوشفته عرفت إنك الأن
بكل المساجد والقرى والمدينه
من كل دوله وقفوا وقفة أخوان
صفوا ورى جثمانكم واقفينه
وعزانا أبو متعب تحلى بالإيمان
مليكنا اللي كلنا طايعينه
اللي وصلك وهو بالحيل مرضان
يوم الأطبه كلهم ناصحينه
أروع مثل إنتم ضربتم للأعيان
معنى التلاحم بينكم خابرينه
بندر علي الهزاع العنزي