بيت وصدى

بيت الأسبوع الماضي كان من طرح الشاعر مبارك محمد بن طرجم من وادي الدواسر حول موضوع غلاء حملات الحج وعدم قدرة كثيرين على دفع تلك المبالغ والبيت يقول:
حملة الحجاج يا ما أغلا ثمنها
عزتي للي فلا يقدر عليها
وكان صدى البيت:
الحياة والموت محد(ن) ضمنها
سهلوا الحجة على اللي يحتريها
مرتن بالعمر كيف نحيد عنها
طاعة المولى لزوم(ن) نقتديها
لكن التجار زادوا من محنها
التلاعب بالسعر للي يجيها
عبدالمحسن بن محمد الجريسي
- الرياض
يا مدير الحملة اللي أنت منها
عندنا لك حاجة جاوب عليها
حملتك بالخير تسعى في وطنها
والا على دورت مخابينا تبيها
المبالغ كايفه للي وزنها
خدمتك وأسلوبها محدٍ رضيها
سعود سعد الحافي - الرياض
والحقيقة ما حد منا ضمنها
لا خبر فيها التلاعب من يبيها
ليت نفرح في نظام غير عنها
للمواطن فيه فرصة نحتريها
ليت يرجع مثل الأول من زمنها
كل أسرة مع بعضها نلتقيها
علي رشيد الرشيد -
رياض الخبراء
يا عريب الجد من عرت عنها
لا حرج دام الطرح ديدن غنيها
جنة الله ما أحد منا ضمنها
لو يحج العمر ويجاهد شقيها
علي جابر آل رولان الفيفي
- بيشة
كل حملة غالية محدٍ جهلها
وكل حملة تقتنص اللي يجيها
تغتنم فرصه وهذا هو املها
السعر مدبول عن اللي يليها
وخذ دعاياتك وكثر في جملها
والصوامل قليلة للي يبيها
حمد عبدالله الوايلي - حوطة سدير
حملات حجاج الحرم لازم نعنها
ونعتدل باثمان ما نأخذ عليها
المغالاة الولي نهاك عنها
في كل شي(ن) للي الحسنة يبيها
بعض الحجيج إيجيك في أبعد وطنها
وتبيع لأجل الحج ما تملك إيديها
سعود عائش التميمي الحربي
- القاهرة
بيت الأسبوع
من طرح الزميل بكر هذال بمناسبة دخول الوسم وموعد هطول الأمطار:
يا هاوي الرحلات في وقت الأمطار
إحذر من الوديان.. وإحذر من السيل
نستقبل صدى هذا البيت بثلاثة أبيات فقط على الفاكس 4871070 أو الإيميل: rb-khozama@alriyadh.com
مقترح لموضوع بيت الأسبوع القادم
بعث للصحفة الأخ خالد المرشود من الرياض موضوعاً لبيت الأسبوع القادم وهو قضية بيع الشعر والمتاجرة فيه.