بيت وصدى

الأسبوع الماضي كان بيت الأسبوع من طرح الشاعر عبدالعزيز الصقيري من حائل والذي يقول:
كانك بغيت الابن يفلح وبه خير
تواصلك مع مدرستهم يكفيك
وقد كان صدى البيت من الشعراء:
حذرا من الاهمال يمشي مع الغير
حطه على يمناك ودايم يخاويك
وللمدرسة خل الزيارة بتكرير
هذا هو المطلب الله يخليك
خلك فطين لا يجي منك تقصير
ومتابعة مطلوب وطابت معانيك
محمد بن عبدالعزيز الخينفر - أشيقر
ابنك أمانة ما تفيد المعاذير
أحذر قبل لا ينطلق من أياديك
خاوه وتابع سيرته في المشاوير
وتابع مع المرشد عسى الله يهديك
تقول سجلته وبجيبه دنانير
لا ما يكفي ولو عطيته مخابيك
سعود بن عبدالعزيز الهزاع - نعام
هذا بداية عام ياالله عسى خير
عسى البداية اجتهاد ويشفيك
ترى التهاون ماله اليوم تبرير
ولو زاد شغلك أنا ما أقدر اعفيك
اد الامانة كان تبغى التباشير
وأسأله بالتوفيق فالله ويلفيك
حمد بن عبدالله الوايلي - حوطة سدير
كانك بغيت الابن يفلح وبه خير
تواصلك مع مدرستهم يكفيك
أسأل عن ابنك يمنحونك تقارير
بالمستوى ترى المدارس توافيك
ومن يهمل ابنه ما يشوف التباشير
تابع أموره يا عسى الله يهديك
عبدالكريم بن خزيم - البكيرية