من صبر نال المطالب

استثيري يامشاعر واحكمي قاف القصيدة
وارفعي قدر المعاني فوق في روس الجبالي
الشعر بحر عميق ودايم أمواجه عنيده
ولايغوصه غير رجلٍ لانطق جاب الفعالي
والسعيد اللي تعلا ثم جعل طيبه رصيده
مايقول فلان سوا مايقول فلان قالي
والشقي من هو يضيع في عجاجه كل صيده
راعي الوجهين مسرع ما انكشف كذبه وزالي
والوفا طبع الرجال أهل التواريخ المجيده
الرجال اللي هدفهم نيلهم كل المعالي
والجفا طبع الرخوم اللي لهم غايه وحيده
جمعهم للمال واحساب المصالح والحيلالي
الرجال تبين في وقت المهمات الشديده
ولايبين الصاحب إلا.. لا اقبلن سود الليالي
فالرخا كلٍ يقول آمر واسوي ماتريده
ولانخيه وقت ضيق يقول لك ياهملالي
الرجل لازم يخلي نظرته دايم بعيده
ولا يرافق غير رجلٍ من كريمين السبالي
ويسكت ولاينطق إلاقايلٍ جمله مفيده
مايسوي مثل من هو حاضرٍ فأية مجالي
ويلزم بالصبر حيث الصبر فالشدة يفيده
ومن صبر نال المطالب دون حيله واحتيالي