عزلت نفسي عن وجيه المكاليح

يا ناشداً عن غيبتي سم لا هنت
هاك الجواب اللي يريحك ويصيح
في وجه من يلحقني اللوم لا غبت
ورماح ذمّه في قفايه مراويح
انا قريب وعايش بخير ما مت
والحمد لله هادي البال ومريح
لكن عن مجلس هل النمنمه شمت
وعزلت نفسي عن وجيه المكاليح
بعد اكتشف ان التجمع على البهت
والزور والتطبيل مع حاية الريح
واستثني اهل الطيب عن كل ما قلت
اللي مجالسهم ينومسك ويتيح
تزداد عرف وطيب من وين مارحت
لو كان فيهم وقتنا التالي شحيح
ولا اخفيك بعض اوقات غيبني الوقت
ومصارع الايام لامست مداويح
في معترك ما سالمٍ منه حتى انت
وابشرك مع كل هذي الملاويح
الحمد لله قاسي العزم ما لنت
وخيول عزمي في نهجها مطاويح
اعنها في طيبها مثل ما كنت
وان جاني اللازم تجيله مضابيح
نايف المقاطي