عليكم سيوف الحق والنصر مسلولة

عسا الله يشتت شملكم يا هل التفجير
عليكم سيوف الحق والنصر مسلولة
لا يا وجيه الشر ما من وراكم خير
الأعمال مشئومة والأهداف مجهولة
غديتو علينا أخطر من آكالة الخنزير
الإرهاب ضد الدين والشعب وشهوله
على أرض النبوة مهبط الوحي والتكبير
يطبل لكم شيخ الشياطين بطبوله
يطبل لكم من هو نبح في ديار بلير
ولاحدٍ رضى فعله ولاحدٍ سمع قوله
مفاهيمكم عكست وقمتو بعكس السير
طريق الهدا منتم بيمه ولا حوله
تهدون ما نبذل من الجهد والتعمير
والأوطان بحمى الله ولا شرار مخذولة
عملكم جريمة منكرة ما لها تبرير
من ابن الوطن حرب الوطن ويش مدلوله
على أرض العقيدة يالبطيني تدق الزير
تبي تفرقنا بس أياديك مشلولة
تسممت من عدوان الأمة وجيت مغير
تسوي سوايا منك ما هيب معقولة
مرقت وخرجت وقمت بالقتل والتدمير
لو إن أمك الخنسا ولو جدتك خوله
ضحية عملك عود وشايب وطفل صغير
وبنت في صبا العمر مقتوله
عسى ما يطير لمن يعادي بلدنا طير
ولا يكتمل عرضه ولا يكتمل طوله
بلدنا بخير ولا على شعبنا تقصير
صلتنا مع الحكام بالشرع موصوله
نقف صف دون الدين واللي يصير يصير
وعين العدو بالملح والسيف مكحولة
ألا يا الحناشل ما كسبتو ولا قمطير
بلدنا آمنة ومن أمنها نكسب الجوله
نهايتكم الخذلان والقتل والتعزير
ما دام الضمائر سود والروس مغسولة
ضويحي حسن العتيبي