هذي أخباري

ياللي تدوّر علومي هذي أخباري
خذها من الراس لا تجهل عناويني
على حدود أربعين أنهيت مشواري
بعد خدمت العلم تسع وثلاثيني
خدمة شرف للوطن والضيف والجاري
وخدمة ملوك العرب حمّاية الديني
علّقت كل البدال الخرش وشعاري
ونجوم الإتقان والتاج ونياشيني
واليوم نمشي على ما يسّر الباري
أحرار عشنا ولا نملك ملاييني
الحال مستور ما حِنا بتجاري
وعن شحذة الناس رب البيت يغنيني
ليا حصل ما كفا بيتي وزواري
للنار ما زاد من نجري وسكيني
في سوق الأموال لا بايع ولا شاري
رزقي على الله وبالمكتوب راضيني
وأرجي من اللي لذنب الناس غفاري
يغفر لي الذنب ويثقّل موازيني
وصلوا على المصطفى ما سايرٍ ساري
على شفيع البشر سيد الثقليني