الرفيق الوفي

لا جفاك الزمان وحصرتك الهموم
دور اللي يشيل الحمل وشتك علاه
واحداً لا نصيته في اللوازم يقوم
قومته تبهج الخاطر وتروي ظماه
ما يشيل الحمول إلا قوي العزوم
والضعيف ضعيف ما ربح من نخاه
الرفيق الوفي تلقاه عند اللزوم
مثل بيت إلى احتجته يذري ذراه
جاهزاً للدفاع وجاهزاً للهجوم
يا الله تكثر أمثاله وتحيي نباه
ثابتاً مثل ضلع (طوق) بين الرجوم
لو تهب الهبائب ما تحرك حصاه
وفاهماً في العوائد فاهماً في السلوم
طيب الساس حراً ما يبي له وصاه
ذاك والله رفيقي جعل عمره بدوم
يسعد الله صباحه يسعد الله مساه
اتشرف بمعرفته وأقول محشوم
حشمته عندي أكبر من جبال السراه
أذكره كل ما هبت علي السمو
هو رصيدي وبنكي في بنوك الغناه
يا عساهم تحت مطاه كل الرخوم
ويا عسى الله في ها الدنيا يطول بقاه
القصائد بمدحه تحتفل كل يوم
ولو مدحته بشعري كيف أبلحق جزاه
والمراجل صعيبة ما تجي بالعلوم
ما تجي كود بالمجهود طول الحياه
يتعب الرجل ما حقق كثير الحلوم
والصبر يوصل الرجال غاية مناه
والليالي تراها لو صفت ما تدوم
مير يا الله توفقنا طريق النجاه
سهل بندر المقاطي