صوت الصورة

مأجور من زار الحرم بالصحن طاف
توافدوا أفواج لاجل الفريضه
محظوظ ياللي حجّج أمه بالاكتاف
اما كبيرة سن.. وإلا مريضه
سعد الحماد، روضة سدير
يا رب سهّل على الحجاج
وانك تحقق مطالبهم
واللي على ظهره المنعاج
حمَال لامه يسابقهم
عبدالله العبودي
أفضل صفه في البر في الحج الأكبر
محرم وشايل فوق الامتان أمّه
رغم التعب في السير مازال يشعر
إنه مقصر يوم كانت تضمّه
سعود بن عبدالعزيز الهزاع، نعام
هالصالح اللي بر في والدينه
ياحظ من بامه مسوي سواته
هذا الذي طبق تعاليم دينه
ويلقى جزاها بالولد في حياته
فهد بن عقيل الطويان، بريدة
ياللي نويت الحج ربي يقويك
برّيت بامك شلتها فوق الامتان
احرص على الانساك تراني بوصيك
واستكمل الواجب بتكميل الاركان
علي رشيد الرشيد، رياض الخبراء
الله ومر بالوالده بر.. واحسان
وامك لها فضلٍ كبيرٍ ومشهود
وصى بها المعبود في كل الأديان
اكسب رضاها يا فتى الطيب.. والجود
عبدالرحمن بن منصور التركي، البكيرية
يا منظراً شفته يسر البال
مسلم يشيل أمه على كتوفه
أنا أشهد إنه يا عرب رجال
عساه يجزا بمعروفه
سعد بن عبدالعزيز الفهد
الحاج وأمه فوق ظهره حملها
يبغى يحججها على روس الاكتاف
يبغى يجازيها بأول عملها
يسعى بها في وسط مكه ويطّاف
شجعان سعود المقاطي، الرياض
للوالدين الحق والبر مطلوب
أمك لها حشمه.. ولابوك تقدير
أجر وثواب عند ربك ومحسوب
اليوم تزرع ثم تقطف من الخير
محمد بن عبدالعزيز الخنيفر، أشيقر
شوفوا المنظر يا بصيرين الأبصار
فيه يتجلى كل بر وموده
على كتوفه شالها رغم الأسفار
يقول يمّه هذا دين وأسده
حمد عبدالله الوايلي
من رضى المعبود بر الوالدين
شلها وأرفق بها تكسب رضاها
كم.. وكم عانت من أجلك يا مدين
في زمنها قبل يتلاشى قواها
علي جابر الزولاني، فيفا
للوالدة فضلٍ كبيراً ومعروف
الله يجازي والدينا بالاحسان
ياللي حملت الوالده فوق الاكتوف
ماظنتي وفيت حقه ولا بان
عبدالمحسن بن محمد المحيسن
هذي أمك.. هذي أمك.. هذي أمك
شالتك ما هو كثير إن شلتها
ما انت لاحق فضلها لو زاد همك
لو لبيت الله بعد حججتها
مساعد العفار
صورة العدد