مجاهيم يبتهج من عرفها وعادها

يالله المعبود يالواحد الحي الحميد
خالق كل البرا محصي عدادها
يالله وفقنا الهدي انت تامر ما تريد
الأمور بحكمتك تصدر بميعادها
طير يا طير السعد سر ليلك بتغريد
القوافي ساري ليلها ومهجادها
نضرب الأمثال باللي عسى عمره مديد
بو محمد قاد سلوم الجمايل قادها
بو محمد والنعم والنعم شبره يزيد
تنشر البيضاء له بعاليات أشهادها
من رجال بالمواقف لهم راي سديد
آل الشيخ رجال عز تعد امجادها
ليلة جيناه عندي حسابه ليل عيد
الشهامة والمراجل مقامه جادها
الشبب نلقاه عنده في البيت المشيد
سيرة بالجود يحري بها ويعتادها
المزاين دار دوره وميقافه جهيد
وللصعاب رجالها لازما ورادها
جات له حمر النعم من قريب ومن بعيد
كل سحجوج يلد الولي حسادها
يا عبدالله عندك اللي كما الليل المديد
مجاهيم يبتهج من عرفها وعادها
كن ضوغ أرقابها لامشت حدب الجريد
لا اعترض طاروقها عد يا عدادها
تعجبك كم بكرة زينها وصفه فريد
تبهج اللجنة في اقفايها ومعوادها
الوجه زين وخذت كل وصف له تريد
والأذني مذعورة ما حلا سنادها
والظهر عشرة اشبار على الحسبة تزيد
ام فحل وبنت فحل قليل اندادها
وهي طموحات الرجال الكرام اللي تجيد
الوفا والعز ميرادها ومسنادها
والرجال الطيبة للجمايل تستعيد
والردي يقصر ولا جابها ولا فادها
الردي فاله لحاله لعله ما يفيد
المراجل ما بذلها لها روادها
بو محمد كل من يعرفك نعم العضيد
يا حكيم زاد سلوم الفضايل زادها
تازن بفعل حكيم ولك راي رشيد
يوم جهال العرب تايهة برشادها
انت يا شيخ الكرم يا عسى عمرك سعيد
بارك الله في رجال وفت بوعادها
والليالي فانية والجمايل ما تبيد
تبقى علوم العز للي ثبت بشدادها
بعدها على النبي خير ختمان القصيد
له صلاتي عند غيوم سمر رعادها
الشاعر سعيد فارس الدوسري