ما بيننا غير القصائد وسيله

يازيد لا تبحث خفايا بصندوق
في وسط صدري من سنين (ن) طويله
ما تدري أن صوتي من الحزن مخنوق
والهم في صدري ضلوعي تشيله
وما تدري أن خدي من الدمع محروق
واللي سواتي فالهوى عزتي له
ومدام تنشدني عن الحب والشوق
أنا شهيد الحب ما ادري قتيله
الناس صارت بين عاشق ومعشوق
وأنا الوحيد اللي مفارق خليله
ما بيني وبينه مطاليب وحقوق
وكل على ما قيل راح بسبيله
وأنا من اللي فوق ثم فوق ثم فوق
ما اطرد ورى المقفي سوات الهبيله
(وجعل السحاب اللي معه رعد وبروق)
في ديرتي يازيد يدرج مسيله
دار (ن) سكن فيها من الناس غرنوق
راع العيون الناعسات الكحيله
غنيت لعيونه على كل طاروق
وكتبت من شأنه بيوت جزيله
ما شفت أنا مثله مع الناس مخلوق
وأموت ما ألقى فالعذارى مثيله
كامل جمال وكامل الحسن والذوق
وبالزين يفرق عن مزايين جيله
من سبته قلبي له سنين مسروق
وما بيننا غير القصايد وسيله
سلطان بن عايض الرقاص