وترى الفتى ستره ربوعه عن العيب ** لو فيه عيبا بينهم ما دريبه

شاعر وقصيدة

الشاعر الكبير زويبن بن بطي الحربي من الشعراء القديمين والذين يعرف عنهم جزاله الشعر وقوته وله العديد من القصائد التي يغلب عليها حكمة التجربه ودراسه الحياة وحث الآخرين من الاستفادة من تجارب الغير والشاعر هو أبو الشاعر العلم (عبدالله بن زويبن) والبيت الشعري فيه من الحكمة ما يجدر بنا ان نحفظه هو بيت من قصيده جميع ابياتها تعد من الذهب من قوة وحكم وترابط وسبك ولجمال القصيدة نوردها حيث يقول:
العقل والتمييز يجمع لك الطيب
واقصر اللسان عن اللحمه القريبه
اسمع جواب مرتب الهرج ترتيب
حتى تعرف المخطية والمصيبه
خلك كما عدن لذيذ المشاريب
وترى الرجل فكره وعقله طبيبه
وترى هروج الناس صفق المخاليب
اللي خطا واللي طعونه عطيبه
واحذر هروج مشذبين العراقيب
اللي لهم بعروض الاجواد غيبه
ومن جا يشيرك طرف له الجيب
واللي مقفي عنك لا تشتقي به
واحذر تعارض سايلات الاداعيب
ومن عارض الشعبان يعدل شعيبه
وكثر المجارح يصعب الشر تصعيب
ذيب يجر الذيب لوحا قنيبه
والى امرك الله ونصيت الاجانيب
اسند على روس الرجال الصعيبه
فتخان الايدي ناطحين المواجيب
خزامت العايل يتالي سبيبه
قلوبهم على النحاوي مرابيب
وتلقى مجالسهم هروجا عجيبه
قصيرهم كنه بعالي المراقيب
ومدموح زله والقايل تهيبه
وترى الفتى ستره ربوعه عن العيب
لو فيه عيبا بينهم ما دريبه
وظلال راسه عن سموم الملاهيب
ودفاه عن بردن تزايد لسيبه
ينام لو كثرة عليه المطاليب
ويا كثر ما دونه يخاصم طليبه
وصلاة ربي عد ما درهم الذيب
وعداد ما جاه من النشر ريبه
وعداد ما ركبوا على الشمخ النيب
ربعا لهم بقلوب الاجناب ريبه