كل يوم يمر كنه عيد لو مافيه عيد

في ربوع المملكة رمز التسامح والسلام
كل يوم يمر كنه عيد لو مافيه عيد
ينعم الشعب السعودي بالتكاتف والوئام
في ذرى صقر العروبة راعى الشور السديد
يا قصيدي هات هات وحظك اللي قام قام
يوم حبك شطر شطر يهتويني زِيد زِيد
من عشق أرض الجزيرة وأنطبع فيه الغرام
لو يعبر ما يعبر ويش تعبيره يفيد
ملحق نفسي مداها والجفن عاف المنام
في هواها يرخص الغالي ويقترب البعيد
من شواطي ساحل الشرقي من الدمام هام
والهيام اللي سكن قلبه قديم في جديد
وأتجه بالشوق غرب وغردت ورق اليمام
يم ريضان الرياض ونجد في ثوب فريد
يوم مر من دهنا الصمان والعالم نيام
وصبح ابراج العليا كنها جبال الجليد
قال يالله تنصر الإسلام وتعز الإمام
راسنا عبدالله الراسي علا الوقت الشديد
في يده مصحف وبيرق عز والأخرى حسام
يقطع القاطع لحد الله بالحد الحديد
وعينه اليمنى بها للشعب والأمة مقام
وعينه اليسرى بها للخصم والعادي مبيد
جعل يبقى في الوجود وعزه المشهود دام
والله الوالي يمده يا جعل عمره مديد
ولولي العهد عاهدنا وحنا له حزام
ذاك سلطان الأمين اللي لبو متعب عضيد
لا ذكر سلطان في وقت الوغى والإلتحام
يحسم الموقف ويغلب كل من راسه عنيد
والولا منا وطاعتهم على صدري وسام
والشعر مني نظمته بأصدق حروف القصيد
ما قصدت أجمع كلام بس لمجرد كلام
غير كلي شوق أعبر بالجديد وبالمفيد
والوطن روحي فداه ولا على روحي ملام
دولتي يعتز فيها الكهل والطفل والوليد
دولتي رمز المحبة والتسامح والسلام
في ذرى صقر العروبة راعي الشور السديد
هادي آل جمان القحطاني