حزن شريته

يا درب ياللي في هواكم سريته
ولا لقيت إلا الجفاء يتبعه لوم
انت كتاب في حياتي قريته
لكن معالم حضرتك ما هي اليوم
كنت على ما قيل حزن شريته
في قلب طارق والثمن كان معلوم
نبضات قلب خايف في مبيته
يسري مع الهاجس لياليه ما ينوم
كنت احسبك طيف يمر ونسيته
واثري انا المنسي وسط زحمة هموم
(سنين) وقلبي ضايع ما لقيته
بأسبابك انت والعواطف له سلوم
يا همي اللي بالحنايا حويته
والقلب هايم في حلاياك منجوم
انت يا ذنب في حياتي جنيته
يا زهرة النرجس ويا ريح يشموم
شاعرك ترجم ما يحسه ببيته
وفي بحركم غرقان ما يقدر يعوم
والقلب ياما من طرفكم نهيته
لكن غشاه الحب وادعاه مشؤوم
طارق بن سليمان السويح
البكيرية