ياليت ما مرّيت والقصر خالي

ياقصر مرّيتك وأنا مقصدي غير
ليتي عقبتك يوم أسيّر بْفالي
ياقصر من جيتك وكبدي على كير
ياليت ما مرّيت والقصر خالي
ياقصر وين مْشَيّدين المقاصير
اللّي بنوبك للمسيّر ظْلالي
ياقصر وين مْكرّمين المسايير
مقلّطة للضيف من كل غالي
أهلي هل الطولات معنيّة الخير
أهل المروّة متعبين الدلالي
وين محمد والرجال المشاهير
وعبد الكريم ومرّخصين الريالي
وقتٍ مضى يوم الليالي معاسير
يلقى ذراهم من به الوقت مالي
وين النشاما والبنات الغنادير
سِرج البيوت مْربيات العيالي
ياقصر عقب العز عشعش بك الطير
من عقب منتب مَدهلٍٍ للرجالي
عقب النشاما والعيال المناعير
اليوم بابك دافِنَته الرمالي
شعر: هيله بنت عبدالكريم العقل
Your browser does not support the video tag.