في طاعتك قلبي المفتون سباقي

قسمك من الحب كل الحب ياخلي
كل الغلا من نصيبك مالَحَدْ باقي
وش هي حياتي بدونك يا بعد من لي
ماشوف غيرك بدنيَايَه وآفاقي
حبك سرى في حنايا الروح في كلي
مملوك عشقك ومنّه أرفض إعتاقي
يافيض حسنٍ لمن يلْمَحْه يستلي
في بسمتك بلسم أيامي وترياقي
من بعد زينك جمال الغيد معتلي
عرش الحلا تَمْلِكِه في كل الأذواقي
يزهاك طبع الغنج واللطف والدلي
يانور شمسٍ تجلت وقت الإشراقي
بَعْدِك حبيبي ذبل وردي يبس فلي
أظلم سما خاطري والكون بي ضاقي
هجرك لقلبي من المعلوق له تلي
بُعْدك حبيبي سبب حزني وارهاقي
لهفة حنيني ودمعٍ بالوله هلي
تشهد على اللي يعاني منه خفاقي
معْ عاطر الأمس بين الفي والظلي
أسترجع اللي مضى واتْصَفَّح أوراقي
لو نِي مِقَصّر بحقك يالغضى قِلِّي
في طاعتك قلبي المفتون سباقي
يزداد قدرك على ما شفت ما قَلِّي
من غير فكرٍ لك النبضات تنساقي
اهْلال يرحل وآخر بعدهِ يْهِلِّي
ولا شفت وصلٍ هتن أو ومض براقي
إن كان قتلي يسرك فأنت في حلي
تفداك روح دمرها حر الأشواقي
وإن كان طال الجفا فالموت أفضلي
أصلا أنا منتهي من حين الفراقي
أدعي إله الكون وأرجيه وأصلي
ايْرِد قلبك لمن حطك بالأحداقي
من حب غِرْوٍ ومن هو فِ الهوى انذلِّي
ما صابهم ربع ما تنزفه أعماقي
مسكين من هو تعلق ظبيٍ مْوَلِّي
مواجعه مالها طبٍّ ولا راقي
ناصر جمعان آل عوض / وادي الدواسر