متعّبني غيابك

على طاري غيابك واشتياقي وين غبت اسبوع
قبل تسألني شلوني وتسألني عن الأخبار
متعّبني غيابك عن عيوني والوصل مقطوع
خذ كل الدموع اللي جرت واستقبلتك أعذار
ترى كل الليال اللي بدونك خانقة وتلوع
وترى كل الجروح اللي من أسباب الغياب كبار
وأنا يا كم على شانك صبرت بخاطرٍ موجوع
وكم عاندت طوفان الهواجس حشمة ومقدار
جمعت الناس في كفة وفرّقتك عن المجموع
وحطّيتك بكفة و رجَحت بك .. والغلا معيار
وأثر قلبك بعيد ، ولا يرده صوتك المسموع
ولا حتى وجودك لوّك أقرب من حمام الدار
على قول البدو ما ميت الا ميّتٍ من جوع
ولا ني ميّت ولا ابغى الهوى منك بحديد ونار
إذا ماني حبيبك يا حبيبي سكّر الموضوع
وغيب بكيفك ولا جيت ما تلقاني ابنٍ بار
أنا مثل السحاب اللي بتيار الهوا مدفوع
أموت.. ولا رجعت ولا السحاب يعاكس التيار