لا.. وا.. حسايف

قالت شباب وقلت وش كثر بي شيب
ماهو دليل الشعر الاسود شبابي
قالت شباب مداريه عني العيب
وانا همومي غيرت كل مابي
ماتدري انالهجر والحب تعذيب
والهجر بعد الحب هو من مصابي
أعطيتها قصة غرام وعذاريب
وتعجبت من قصتي وما جرا.. بي
من صاحب أرسلت يمه ولا يجيب
مدري وش اللي صار وقت اغترابي
كنت اذكره في كل ليلة ولا يغيب
وذا نويت الفكر يمه سرا ..بي
آثره غدر.. بي صاحب العهد والطيب
لا واحسايف كيف باع وشرا.. بي
لا واحسايف ضبينا انقلب ذيب
في داخل قليبي بنابه سطا.. بي
مالوم.. عيني من شديد اللواهيب
تنثرت دمعاتها من صوابي
ودموع عيني غصب عني مساكيب
لين انتثر دمعي وبلل ثيابي
ياما تمنيت الليالي ورا الغيب
تجيب حب مثل وبل السحابي
وياما اتمنى قلب راعي مواجيب
يعطيك حب فوق حد النصابي
الناس فيهم الردي وكايد الطيب
والطيب حده مثل حد السرابي
قصه غدت بي فوق روس المراقيب
ارقب على روس الهوى من عذابي
قالت شباب وقلت وش كثر بي شيب
لا مات قلبي ما نفعني شبابي
عبدالله صبيح الشراري