للجود في وجهه دلايل وعنوان

هات القلم ياصاح واكتب على شان
أملي لك اللي داخل القلب مكنون
واضبط كلامي عن زيادة ونقصان
ترى الأديب بزيغة الزاج مرهون
اكتب مطيعات المثايل بسلمان
وابو فهد ما ينتوجه له الدون
سلامٍ احلى من شهاليل الامزان
با أزكى تحياتي لمولاي مقرون
هداج تيما اللي له الجود برهان
فيضه على مظمي وجايع ومديون
أن جاه ظميان صدر منه رويان
ملجأ جعله الله فرج كل مشحون
البر يشهد لاخو نوره بالاحسان
وصي من لا له قرابة يعولون
للجود في وجهه دلايل وعنوان
جزل العطا كنه على مال قارون
طير الفلاح اللي مجانيه مرخان
نادر صواريم الحرار أشقر اللون
أليا شهر ما ينهض ألباز جنحان
وان صاد بدد للجوارح يعلفون
في هدته ياما شبع كل جيعان
الجود في مدلى مهاويه مضمون
من العقل مليانٍ من الكبر عريان
دايم عليه المستحين يتجرون
ودايم وبيته بالا جاويد مليان
يوم أنهم عن جيته ما يردون
يضحك حجاجه كل يوم ولاشان
عليه كل أفواج الاجواد يرهون
ما حط له حجاب ولاصك بيبان
لو يكثرون الناس ولا يقلون
وان جيت أبا اعدد فضايل كحيلان
ما تنحصر لي فالقوافي على النون
لو بعض جوده ينوزن له بميزان
رجح باجا واللي بواديه مدفون
له الفخر سامٍ على خير سيسان
وعن الدنايا عاصمه والي الكون
غيث من ألوسمي شمل كل الأوطان
يغد السنين اطناف وانهار وعيون
تباهت أزهاره وجني الكما زان
والدر له غواصة البحر يجنون
خلا صحاري نجد جنه وريضان
سعد السعود وكلٍ أمن وما مون
وتحدث السمار في كل ديوان
عنها وعن سلمان وبليس ملعون
وساهمت بشباب التعابير طربان
والمدح في كسابة الحمد مسنون
مولاي ياللي لشرف المدح عنوان
اقبل هدايا اللي لك الشعر يهدون
يا مشعلً يوضي على رأس مابان
ما عنه طلابة نواله يتيهون
الشعر في غيرك محاريف و أوزان
هياكلٍ لو أهل ا لشعر يبنون
ارعه رعاك اللي فرض خمس الأركان
لولاك مات بداخل القلب مخزون
الشعر بالتشجيع من دور حسان
واحيا المواهب و أول السلم عربون
والشعر بحرٍ فيه فايز وغرقان
وأهل ا لغواية في ضحاحه يعومون
والآدمي ياسيدي قلب ولسان
ومن لازكا به صار للزاد ماعون
واسلم ودم بالعز ما فوق الأغصان
تجاوبن جوزٍ من الورق بلحون