تاج راس المجد

الله عطاك الملك عاهل ومدهال
المعطي الله وأنت كلك مزايا
ياتاج راس المجد يالشامخ العال
ياالحاكم العادل عدوا الخطايا
شعبك يماري بك على كل الاحوال
فرز الوغى وإن نوخن المطايا
ليا غضبت أغضب من البحر لاصال
وليا رضيت أحلى حليب العطايا
ياعزوة الشعب السعودي ليا اهتال
أنا أشهد أنك له تسوي سوايا
عبدالله اسمك وانت سامي وعيال
ليا بين العيلة خبيث السجايا
تبدل الأبدال وتحل الأبدال
من حكمتك كنك تعرف النوايا
مخضرم وبارع ونقاض فتال
لاتاهت الأريا تجيلك هدايا
شف من دعيت الشعب ياطيب الفال
هذا هو الشعب السعودي سرايا
يبايعك يامعرب الجد والخال
زيزوم يعرب ما بقت له بقايا
ياسيدي والشعب يقنع بالأفعال
مايقتنع بمساجلات المرايا
اكرمتنا بالعدل واللطف والمال
شعبك لاجل عينك يدوس المنايا
وأنا قصيدي فيك ملهم ويختال
فيك يتميز وانت كلك مزايا
جميعان بن عبدالله الشاهر الشمري