ساكن في حواليه

البارحه..!! هاجوس قلبي سرى فيه
لين الفجر نوره ضحك لي حجاجه
ولو يسَهر الهاجوس جفني بطاريه
اخير من جلسة نفاق ولجاجه
أحيان لأبطأ يوحش الفكر طاريه
ويلفني جو(ن) غريب(ن) مزاجه
لاغاب عني خاطري صعب اسليه
حتى الفضا تصغر بعيني فجاجه
خل(ن) هدب عينه عتيق السحر فيه
رمشه لا سلهم يفتن اللي يواجه
خده كما نور القمر يوم احليه
لبسه ربي من حلا الخلق تاجه
غيره من الخفرات مالي غرض فيه
وان اشهد ان طردي لغيره سماجه
قلب(ن) تبع غيره تعوقه طواريه
مثل المريض اللي يغير علاجه
الشارع اللي ساكن(ن) في حواليه
ما ارتاح لين آخذ عليه ادراجه
ادمان حبه صعب(ن) اترك تعاطيه
يا فرحة الغائب وصبح وابتهاجه
مادام قلبه واقف بصف مغليه
ما قامت الدنيا ولا اريد حاجه