جوال الميدان

جوال: عيدك مبارك يا مجول وعساك من عواده؟
مجول: علينا وعليك وكل المسلمين يا حبيب أخوه.
جوال: علومك مع إجازة العيد شمالية والا غربية؟
مجول: تقدر تقول على أطراف الرياض.
جوال: يعني (كشته) خطافية؟ في ها الأجواء (الصقيعية)
مجول: الله يرزق العباد بالمطر؟
جوال: علوم أهل الإبل؟
مجول: بشكرون ويحمدون وسوقهم مولع.
جوال: سمعت عن صفقة العيد؟
مجول: الا قل صفقات فلكية
جوال: مزاين نوفا على الأبواب وجوايزها ونوماسها ما فيها حكي تنومس وتغري.
مجول: أنشهد وفي كل العالم سباق أو مهرجان جوايزه وتنظيمه ما يغريك تقل المشاركة وتقصر العنوه.
جوال: وعلوم أهل الخيل؟
مجول: أبرز محاورها صفقة العيد.
جوال: قصدك صفقة العيار الثقيل للأبيض.
مجول: على قدر أهل العزم تأتي العزايم وفي النهاية مثل ها الصفقة تجير لمصلحة الفروسية السعودية.
جوال: الا ما تقولي صفحة الميدان.. كلها عن عطايا الله.
مجول: يا حي هاك العين ويا حي من رفع قدرها وعلا شانها.
جوال: بالعون صفحة ما تجي قطرة في بحر هالدعم المتواصل والسخي من رموز هذا الوطن.
مجول: وعلوم السباقات؟
جوال: العين على كأس العدل والخيل اللي بتسجل فيه.
مجول: توقع مشاركة انا لها وذكي.
جوال: يا ذكي كأس الكلية ما هوب بعيد.
مجول: وآخر العلوم؟
جوال: يا ما أحلى شبة النار في مجلس ما فيه نفسٍ ثقيلة.