مواري الجفا

الغلا لا يباع ولا شريته
رد قلبي على ماجاه يكفيه
مابقى فيه عرقٍ ماكويته
يوم قلبي على كفي مهديه
لك ولكن خسارة مارعيته
كل زينٍ بغيرك قلت مابيه
كن مافيه زين الا خذيته
قلت يازين زينه من يماريه
من يماري جمالٍ به لقيته
اثره القلب يوم الحب معميه
مالقى فيك شيٍ ما بغيته
ويوم شفت الجفا بانت مواريه
منك أيست فاللي بك رجيته
كان قلبك علي ناوي تقسيه
رح بدربك مادام انك نويته
خل الأيام ما تبغى تسويه
خل الايام تفعل ما رضيته
مابقى في حياتي حلوٍ ارجيه
ولا بقى مر فيها ما رويته
كل شي بديته معك بانهيه
وكل شيٍ يذكرني نسيته
خل هرج الغلا ما ودي أوحيه
الغلا لو تبيعه ما شريته
هاجد السبيعي