كلام الناس

يا سامعٍ قولي عسى الله يسعدك
عسى الولي يكفيك شر المصايب
اسمع كلامي زين لو كنت ما قصدك
بعطيك موجز فيه درس وغرايب
الموت لو قفيت تلقاه يطردك
ولا بد ما تركز عليك النصايب
بالاخره ما فيه شيٍ يساعدك
الا رضى ربك وفعلك سبايب
نفسك هواها يم الاخطار يوردك
لاصرت تتبعها بلايا حسايب
حاسب ضميرك واذكر اللي يشاهدك
الواحد القهار منش السحايب
من شان دينك جاهد اللي يجاهدك
الماكر الغدار ساس النشايب
ابليس بالتضليل والكذب يوعدك
ويترك في يومٍ تضيع القرايب
سود الليالي لوصفت لك تعاندك
وان طال عمرك شفت فيها عجايب
ما ينفعك لاحتجت يا كود ساعدك
وجيبك يفكك من كثير الطلايب
ان فاض مالك نايد الخلق تاردك
وان قل مالك قالو الناس عايب
لاذاع صيتك قاصر الباع يحسدك
ويفرح بفعلك عزوتك والحبايب
من لاعرف قدرك لياغبت يفقدك
وينخاك لاصكت عليه النوايب
اعرض عن اللي في كلامك يراددك
حتى ولو في هرجتك كنت صايب
واعرف كلام الناس ماهوب زايدك
الهرج ما ينقص عطيب الضرايب
اسمع كلامي زين لو كنت ماقصدك
ترا كلامي فيه درس وغرايب